منة حازم : بين المثالية والخوف معتقدات خاطئة ـ الحصاد نيوز

اليوم : الخميس 21 مارس 2019
رئيس مجلس الادارة : ايمان عاطف
رئيس التحرير: اندرو رزق

منة حازم : بين المثالية والخوف معتقدات خاطئة ـ الحصاد نيوز
عدد المشاهدات : 66
2019-03-20 11:33:21

منة حازم : بين المثالية والخوف معتقدات خاطئة ـ الحصاد نيوز

بخاف ـ منة حازم

دايمًا بخاف،...  دايمًا... مزيج من كل حاجة وعكسها، خوف ع اللي بنيته،

متتبناش بالساهل عشان أهِده بالساهل.....

بس أنا مش مثالية ولا أنتمي للمثالية بشئ ؛ لأن كل انطلاقة جنونية مني بتبقى إهانة للمثالية.. ...!!

زي مثلًا  << شخص ملتحي >> قررنا نرمز له بالدين ونحسب كل خطوة إهانة للإسلام.. !

هو مش الإسلام.. هو إنسان بيحترمه الإسلام..... بيحترمنا كلنا، ربنا خلقنا عشان إعمار الكون أه، لكن كمان خلقلنا القرآن يونسنا وقت الحزن ويعلمنا، وعلمنا الدعاء لما نحس إننا تايهين والشيلة تقلت علينا، وخلقنا لبعض، مأتعبناش لوظيفة واحدة، عالم بعباده كويس جدًا وخبير بضعفهم و وَهَنهُم .. ومطردش حد من رحمته أبدًا، فاتح أبواب التوبة كل لحظة.. ومهتم بكل حاجة بنحسها وبكل احتياجاتنا، ربنا مطلبش منا نبقى مثاليين وهو الأعظم.. ..

عباده هيحاسبوا بعض ع المثالية وعدمها؟!
لما تشوف << واحدة محترمة >> مثلًا وبتقوم بدور ما في أي مجال،وف حياتها فرفوشة وبتضحك وألش وهزار، أو مرت بأي مشكلة، أو غلطت غلط كبير أو صغير، أو إيه بس،؟!

أنا لما كنت بكتب شعر أي كلام كده ميتصنفش شعر أساسًا و15 واحد بالكتير كانوا بيقرءوا لي لقيت مرة واحدة بتقولي: إنتي بقيتي أديبة والناس بتقرأ ليكى  معادش يصح تنزلي تفاصيل يومك ولا نكت ولا حزن ولا فرح.. بل واتمنعت من الإندماج مع اللي فِ سني بحكم إن الأكبر مني شايفيني أحسن وأرقى بقا ودماغي أكبر ولو اقترنت بعامة المجتمع هبوظ وهشوه سيرتي الذاتيه العريقة اللي كانت عبارة عن شوية نصايح وحكم ومواعظ وخبرات سابقة ساذجة ف إذاعة المدرسة .... !..

أنا فاكرة من كام سنة كده كانت حالتي النفسية مش كويسة أبدًا وكنت بقعد لوحدي وأول ما الحصة تخلص أقوم أمشي ف الخمس دقايق اللي بين الحصص دي وأرجع أول ما المستر يدخل، ...

عارفين كانوا بيقولوا عليا إيه؟

مغرورة....!

ببص للعالم من فوق وشايفة نفسي على إيه؟ ومش حابة أقعد مع زمايلي عشان هما مش من مستوايا.....!

وصلني الكلام ده السنة دي من واحدة كانت معايا في الفصل بتحكي لواحدة تانية..!..

لكن لو كانوا يعرفوا حجم المعاناة النفسية اللي بمر بيها وأد إيه مش عايزة آذي أي حد أو أكئِب حد كان ممكن يفهموا هما غلطوا أد ايه..!!!!!!!!!!!!!
كنت بسمع أغنية مرة، واحدة بالفصل قالتلي : لا لا لا ده أنا غيرت رأيي فيكي تمامًا.. واحدة مسكت مذكراتي مثلًا لقت كلام طبيعي عميق أليم زي بقية الناس عادي خالص لقيتها بتقولي مش إنتي اللي بتدعينا للفرحة ونعدي كل حاجة، ... !  ... إيه بقا ؟!..

الإنسان المثالي - في عيون فئة من الناس - الناس بتحول مثاليته لقيد ! ، متخرجيش، متسهريش، متضحكيش، متعيطيش، متبعديش، متقربيش، متغلطيش، مترقصيش، متغنيش، متتعصبيش، متحسيش....!!

كل المشاعر الآدمية بتتحول لجهاز كنترول فِ إيديهم بيختاروا ليكي  تحسي بإيه بالظبط ......؟!..
أنا شخص مثالي.. بس عارفين ليه؟

عشان بوازن بين نفسي وبينكم.. باخد وقتي ف حزني بدون ما ولا حد منكم يحس بأي تقصير ف أي وظيفة بعملها،..

يمكن من الحاجات الحلوة اللي عمري ما هنساها لما خلود قالتلي :  أجمل حاجة فيكي إنك لما كنتي قبل ما بتطلعي تكلمينا كنتي بتبقي مكشرة وسرحانة ومش قادرة تتكلمي وأول ما بتمسكي الميكروفون بتضحكي وتبتسمي وتملي الدنيا تفاؤل،..

كانت خلود مصوراني قبل وبعد ما أطلع وحاطاها خلفية لموبايلها، ساعتها كانت أول مرة أحس إني بني أدم عادي فاهمين؟..
أنا مثالية لأني بعمل كل حاجة، ..كل حاجة..

ربنا دايمًا معايا فِ كل خطوة .. كل همسة.. عمري ما بعدت عنه حتى برغم إني بقصر كتير فِ حقه..

مثالية لأني بشغل عقلي فِ كل تفصيلة، ومن ضمنها الجنون، بتجنن بعقل، بتجنن وأنا مقتنعة إن الجنان والفرح قمة العقل..

مثالية لأني ست كبيرة وطفلة صغيرة ومراهقة كله ف نفس الوقت.. مثالية لأني بدي فيا كل حاجة حقها..

مثالية لأني عمري ما طلعت فوق إلا وشديت حد معايا .. وعمر ما حد جنبي وقرب فعلًا مني وحس إنه قليل..
أنا مثالية جدًا ومثاليتي مش قيد.. مثاليتي أكبر حرية ليا في الكون.. وهفضل حرة


موضوعات ذات صلة
تعليقات القراء من خلال فيس بوك